“Rus vətəndaşları olan ermənilər Laçın yolundakı aksiyadan sonrakı mərhələdə Qarabağdan çıxarılmalı idilər. Bundan əvvəl də bir qrup rus vətəndaşı Qarabağdan təxliyə edilmişdi. İndi də növbəti qrupu Rusiyaya qaytarılır”.
Bunu hafta.az-a hərbi ekspert Elxan Şıxəliyev Rusiya sülhməramlılarının Qarabağdan təxliyə etdiyi rus vətəndaşları ilə bağlı açıqlamasında bildirib. Ekspert bu təxliyənin arxasında müharibə, yaxud antiterror əməliyyatının keçirilməsini zəruri edən məqamlara diqqət çəkib.
Ekspertin sözlərinə görə, o rus vətəndaşları olan ermənilər yeni ildən öncə “qohumlarının” yanına gələn Rusiya vətəndaşı olan ermənilərdir. Bir qrup erməni isə Ukrayna ilə müharibədən yayınmaq üçün Qarabağa gəlmişdilər.
“Bu təxliyə Qarabağ ərazisində mümkün ola biləcək antiterror əməliyyatı ilə birbaşa əlaqəli olmasa da, antiterror əməliyyatları istisna edilmir. Necə ki, ərazilərimizdə əli silahlı erməni terrorçular var, Azərbaycanın onlara qarşı “Fərrux”, “Qisas” kimi əməliyyatları keçirmək hüququ var. Təbii ki, keçiriləcək antiterror əməliyyatları ermənilərin davranışlarına bağlıdır. Xüsusən də Qarabada yaşayan qondarma separatçı rejim erməni birləşmələrini çıxartmalıdır. Ruben Vardanyan kimi ermənilər bölgədə qalmamalıdır. Bu tələblər tam yerinə yetirilməyənə qədər Azərbaycan istənilən vaxt hərbi əməliyyatlar keçirə bilər. Ya ermənilər sakit şəkildə çıxıb getməlidir, ya da biz bunu güc vasitəsi ilə həyata keçirməliyik”.
Ekspert bildirib ki, hazırda Laçın-Xankəndi yolunda keçirilən aksiyaların fonunda gözləntilər ondan ibarətdir ki, missiyalarımızın Qarabağda sərbəst hərəkətinin təmin olunması yönündə qondarma rejimin rəhbərliyindən müsbət cavablar almalıydıq. Amma bu mesajları almırıq.
“Deməli, ermənilər həm Qarabağda, həm də şərti sərhəddə vəziyyəti gərginləşdirilməkdə davam edir. Bu gün Qarabağada siyasi böhran danışıqlar, sülh yolu ilə çözüləcək prosesə bənzəmir. Ermənistan artıq sərhəddə Avropanın, Fransanın, almanların polisini, əli silahlılarını, mülki missiyasını yerləşdirir və bu vəziyyəti daha da gərginləşdirir. Bu vəziyyətin gərginləşməsi üzərinə Rusiyanın narazılığı yaranır. Nəticədə Ermənistan Rusiya və Azərbaycan tərəfindən atılacaq addımlara hazır olmalıdır. Əslində Azərbaycan tərəfi sülh sazişini təklif edib. Ermənilər buna müsbət yanaşmır. Siyasi böhran danışıqlar yolu ilə çözülmürsə, deməli silahlar danışacaq. Ermənistan bunu belə anlamalıdır və biz 2023-cü ilin sonuna qədər bu ölkəyə bir limit tanımışıqsa, Ermənistan geosiayasi vəziyyəti bu il çərçivəsində qiymətləndirməlidir. Gedişat onu göstərir ki, sülh sazişi imzalamaq Ermənistan üçün daha uyğun variant olacaq. Zaman və proseslər Ermənistanın əlehinə işləyir”.
